काठमाडौं । आन्तरिक राजस्व कार्यालय नयाँ वानेश्वरले राष्ट्रिय कर दिवस, २०८१ को पूर्वसन्ध्यामा बृहत् रक्तदान कार्यक्रम गर्ने भएको छ । कार्यालयले बुधबार बिहान ११ देखि दिउँसो ३ बजेसम्म कार्यालयको प्राङ्गणमा बृहत् रकतदान कार्यक्रम आयोजना गर्ने भएको हो ।
उपत्यका लगायत विभिन्न जिल्लामा डेंगु संक्रमितको संख्या बढ्दै जाँदा स्वास्थ्य संस्थाहरूमा रगतको उच्च माग भइरहेको अवस्थालाई ध्यानमा राखी राष्ट्रिय कर दिवसको पूर्वसन्ध्यामा उक्त कार्यक्रम गर्न लागिएको कार्यालयका प्रमुख कर अधिकृत गोविन्दराज आचार्यले बताए । उक्त कार्यक्रममा जिल्ला प्रशासन कार्यालय काठमाडौँ, अधिकृत समाज काठमाडौँ र नेपाल रेडक्रस सोसाईटी जिल्ला शाखासँग समन्वय एवं सहकार्य गर्ने प्रमुख आचार्यले बताए ।
बृहत् रक्तदान कार्यक्रममा करिब एक सय जनाभन्दा बढी रक्तदाताको सहभागी रहने लक्ष्य कार्यालयले राखेको छ । उक्त कार्यक्रममा अर्थ मन्त्रालय, आन्तरिक राजस्व विभाग, उपत्यकास्थित आन्तरिक राजस्व कार्यालयहरू, काठमाडौँ महानगरपालिकाका वडा नं १० र ३१ को कार्यालय तथा अन्य सरकारी कार्यालयहरूमा कार्यरत कर्मचारीहरू, रोटरी क्लब अफ बानेश्वर, लायन्स क्लब मिनभवनमा आबद्ध सदस्यहरूलाई रक्तदाताको रूपमा सहभागिताका लागि अनुरोध गरिएको छ ।
यस्तै, प्रमुख कर अधिकृतले अन्य इच्छुकलाई समेत उक्त कार्यक्रममा सहभागी भई योगदान पुर्याउन आव्हान गरेका छन् ।
