काठमाडौं । छानबिन समितिले असोज दोस्रो हप्ता धादिङको धुनीवेशी नगरपालिका–९ झ्याप्लेखोलाको पहिरोमा ठूलो मानवीय क्षति हुनुमा धादिङ प्रशासनको लापरबाही भएको निष्कर्ष निकालेको छ ।
असोज ११ र १२ वर्षासँगै आएको पहिरोले राजमार्गमा रोकिएका गाडीहरु पुरिँदा ३५ जनाको ज्यान गएको थियो । घटनाबारे छानबिन गर्न प्रहरी प्रधान कार्यालयले एसएसपी सिद्धिबिक्रम शाहको नेतृत्वमा समितिले गठन गरेको थियो ।
समितिले घटनास्थलको अवलोकन गर्नुका साथै स्थानीय र सवारी साधनसँग सम्बन्धित व्यक्तिहरुसँग सोधपुछ गरेको थियो । अब प्रतिवेदनलाई अन्तिम रुप दिएर बुझाउने तयारी गरिएको छ ।
प्रतिवेदन अनुसार झ्याप्लेखोलामा ठूलो मानवीय क्षति हुनुमा धादिङ प्रशासनको कमजोरी देखिएको छ । भारी वर्षा हुने मौसम पूर्वानुमान महाशाखाको सूचनालाई गम्भीर रुपमा लिएर प्रतिकार्यको काम नगरेको समेत पाइएको छ ।
त्यतिबेला धादिङको प्रमुख जिल्ला अधिकारी (सीडीओ)मा राजेन्द्रदेव पाण्डे थिए भने एसपीमा गौतम केसी थिए । सीडीओकै नेतृत्वमा जिल्ला विपद् व्यवस्थापन समिति रहन्छ । तर ठूलो वर्षा आउने पूर्व जानकारी हुँदैहुँदै सीडीओ पाण्डेले छलफल डाकेर प्रतिकार्यको काम नगरेको समितिले निष्कर्ष निकालेको छ ।
त्यसैगरी सीडीओ र प्रहरी प्रमुखबीच कुनै समन्वय समेत नभएको समितिले बताएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले नारायणगढ–मुग्लिन हुँदै नागढुंगासम्म सवारी चलाउन रोक लगाउने सूचना समेत जारी गरेको थियो । तर धादिङ प्रशासनले राजमार्गमा सवारी चलाउन रोक लगाएन ।
अनि, गोरखाबाट काठमाडौं आउँदै गरेको ना ४ ख २२७० नम्बरको बस, चितवनबाट काठमाडौं आउँदै गरेको बा २ ख १३४५ नम्बरको माइक्रो र लु १ ज ४५७७ नम्बरको विंगरलाई पहिरोले झ्याप्लेखोलामा पुरियो ।
घटना लगत्तै सीडीओ पाण्डे र एसपी केसीको जिम्मेवारी खोसिएको थियो । उनीहरुलाई जिम्मेवारीबाट हटाउँदै सीडीओमा सुमन घिमिरे र एसपीमा दीपेन्द्र शाहीलाई पठाइएको थियो ।
छानबिन अन्तिम चरणमा पुगेको केही दिनमै प्रतिवेदन बुझाउने तयारी समितिको छ ।
