काठमाडौं । दाङ देउखुरीको राजपुर गाउँपालिकामा एकजना वडा अध्यक्षमाथि भाला प्रहार भएको छ । मंगलबार दिउँसो राजपुर गाउँपालिका वडा नम्बर ५ का वडाध्यक्ष टंक विष्टमाथि कार्यकक्षभित्रै भाला प्रहार भएको हो ।
उनको अवस्था गम्भीर छ । हाल उनको लमही अस्पतालमा उपचार भइरहेको छ ।
राजपुर गाउँपालिका वडा नम्बर ६ खयरभट्टी निवासी २० वर्षीय विजय नेपालीले वडाध्यक्ष विष्टमाथि दिउँसो करिब ४ः३० बजे छातीको वायाँ भागमा भाला प्रहार गरेर घाइते बनाएको प्रहरीले जनाएको छ । नेपालीलाई प्रहरीले नियन्त्रणमा लिएको छ ।
घाइते भएका वडाध्यक्षलाई उपचारका लागि लमही अस्पतालमा पुर्याइएको प्रहरीले जनाएको छ भने वडाध्यक्ष विष्टमाथि आक्रमण हुनुको कारण खुलेको छैन ।
घटनाको बारेमा अनुसन्धान अगाडि बढाइएको प्रहरीले जनाएको छ ।