काठमाडौं । अख्तियार दुरुपयोग अनुसन्धान आयोगले यातायात कार्यालयका १७ कर्मचारी र ट्राफिक प्रहरीको मोबाइल जफत गरेको छ । अख्तियारले यातायात व्यवस्था कार्यालय चाबहिलका कार्यालय प्रमुख पेशलकुमार पोखरेलसहित १७ कर्मचारीको २५ मोबाइल जफत गरेको हो ।
त्यसैगरी अख्तियारले काठमाडौं उपत्यका ट्राफिक प्रहरी कार्यालयमा कार्यरत असई डोरहरि नेपालसहित ३ जनाको मोबाइल नियन्त्रणमा लिएको छ ।
नेपाल ड्राइभिङ एन्ड रिकन्डिसन सेन्टर प्रालिका मेनेजर बालकृष्ण सिंहसहित ७ जनाको ९ थान मोबाइलसमेत जफत गरिएको अख्तियार श्रोतले जनाएको छ । त्यसैगरी लिखित परीक्षा दिई फेल भएको मितिले ३ महिना अवधि नपुग्दै पुनः परीक्षामा सहभागी भएका परीक्षार्थीको उत्तरपुस्तिका पनि अख्तियारले जफत गरेको छ ।
चाबहिलका कार्यालय प्रमुखसहित अन्य कर्मचारी र ट्राफिक प्रहरीको मिलेमतोमा ५ हजारदेखि १० हजार लिई लाइसेन्सको लिखित परीक्षामा फेल भएकालाई पास बनाउने गरेको पाइएपछि अख्तियारले उनीहरूको मोबाइल जफत गरेको जनाएको छ ।
