काठमाडौँ । राष्ट्रिय मानवअधिकार आयोगका कार्यालयहरू दसैँ, दीपावली तथा छठ पर्वका बिदाका दिनमा पनि खुला रहने भएका छन् ।
मानव अधिकारको उल्लंघनका घटनाको उजुरी लिन र आकस्मिक प्रकृतिका घटनामा अनुगमन गर्नका लागि राष्ट्रिय मानवअधिकार आयोगको केन्द्रीय कार्यालय, हरिहर भवन, ललितपुर तथा प्रदेश शाखा कार्यालयहरू बिदाका दिनमा पनि बिहान ११ बजेदेखि दिउँसो २ बजेसम्म खुला रहने व्यवस्था गरिएको हो ।
मानव अधिकार उल्लंघनका कुनै घटना घटेमा आयोगका नजिकका कार्यालयमा तत्काल जानकारी गराउन आयोगले सबैमा अनुरोध गरेको छ ।
आयोगले विज्ञप्ति निकालेर सार्वजनिक बिदा तथा चाडपर्वको समयमा सर्वसाधारणको आवतजावतमा कठिनाइ उत्पन्न हुने, अपराधका घटनामा वृद्धि हुने, महँगी तथा कालोबजारी बढ्ने, सार्वजनिक सेवा प्रवाह र सहज आपूर्तिमा अवरोध सिर्जना हुने जस्ता क्रियाकलाप हुने सम्भावना रहनेतर्फ सरकारको ध्यानाकर्षण गरेको हो ।
चाडपर्वको समयमा सेवा प्रवाहलाई चुस्त दुरुस्त बनाउन र शान्ति सुरक्षाको अवस्थालाई मजबुतबनाउनआयोग सरकारलाई निर्देशन गरेको छ । सेवा प्रवाहलाई चुस्तबनाउने र शान्ति सुरक्षालाई मजबुत बनाउने सरकारको कार्यमा सहयोग गर्न आयोग सम्बद्ध सबै पक्षलाई आग्रह गरिएको छ ।
