काठमाडौं । स्पेनमा सम्पन्न संयुक्त राष्ट्रसंघीय सम्मेलनमा सहभागी गराउने नाममा नेपालबाट असम्बन्धित व्यक्तिहरूलाई लगिएको आरोपबारे छानबिन गर्न समिति गठन गरिएको छ ।
गृह मन्त्रालयले केन्द्रीय अनुसन्धान ब्युरो (सीआईबी) का प्रहरी वरिष्ठ उपरीक्षक (एसएसपी) होविन्द्र बोगटीको संयोजकत्वमा छ सदस्यीय छानबिन समिति बनाएको हो । समितिमा सीआईबी र मानव बेचबिखन अनुसन्धान ब्युरोका अधिकारीहरू रहेका छन् ।
गृहमन्त्री रमेश लेखकले गृहसचिव गोकर्णमणि दुवाडी र प्रहरी महानिरीक्षक (आईजीपी) दीपक थापालाई उक्त प्रकरणको छानबिन गर्न निर्देशन दिएका थिए ।
प्रधानमन्त्री केपी शर्मा ओली असार १४ गते स्पेन भ्रमणमा गएका थिए र असार २० मा फर्किएका थिए । तर भ्रमणमा गएका केही सदस्य स्वदेश नफर्किएको भन्ने समाचार सार्वजनिक भएपछि संसदमा पनि यसबारेमा प्रश्न उठेको थियो ।
