काभ्रेपलाञ्चोक । बाढीका कारण ह्युमपाइपमाथिको माटो बगिएपछि बनेपा–नाला–भक्तपुर सडक पुनः बन्द भएको छ ।
पुल भत्किएपछि वैकल्पिक रुपमा ह्युमपाइप राखेर आइतबार बिहान मात्र खुलाइएको सडक साँझपखको वर्षाले पुनः अवरुद्ध भएको इलाका प्रहरी कार्यालय बनेपाले जनाएको छ ।
पुण्यमाता खोलामा अड्याइएको फलामको अस्थायी पुल शुक्रबार राति भत्किएपछि सडक सञ्चालनमा ल्याउन बनेपा नगरपालिका र सडक विभागको पहलमा आइतबार ह्युमपाइप राखिएको थियो ।
तर, आइतबार साँझदेखि नाला क्षेत्रमा परेको अविरल वर्षाका कारण बाढीले ह्युमपाइपमाथिको माटो बगाएपछि सडक फेरि पूर्णरूपमा बन्द भएको हो ।
उक्त सडक अरनिको राजमार्गअन्तर्गत धुलिखेल–सूर्यविनायक खण्डको वैकल्पिक मार्गसमेत हो ।
