ललितपुर । बाढीले बगाएर ललितपुरमा एक सवइञ्जिनियरको मृत्यु भएको छ । ललितपुरको दक्षिणपूर्वी भेगमा रहेको महाँकाल गाउँपालिका–६ ठुलादुर्लुङमा खोल्सामा आएको बाढीले बगाएर सवइञ्जिनियर सविन दाहालको मृत्युु भएको हो ।
महाँकाल गाउँपालिका–६ का अध्यक्ष विनोद चौलागाईंका अनुसार बुधबार साँझ ठुलादुर्लुङस्थित भर्याङखोल्सामा आएको बाढीले बगाउँदा महाँकाल–४ कालेश्वर घर भई ललितपुर महानगरपालिका–२९ हरिसिद्धी बस्ने २१ वर्षीय सविन दाहालको मृत्यु भएको हो ।
खोल्साको बाढीले साँझ ७ः३० बजेतिर बगाएका दहालको शव राती १० बजेतिर फेला पारिएको बताइएको छ । बाढीका कारण त्यस क्षेत्रका सबै सडक बन्द भएका कारण नेपाली सेनालाई खबर गरेर हेलिकप्टर मगाएको चौलागाईले बताए ।
