काठमाडौं । अनेरास्ववियुको २४औँ राष्ट्रिय महाधिवेशनबाट नयाँ नेतृत्व चयन गर्न सम्पन्न निर्वाचनको अन्तिम नतिजा सार्वजनिक भएको छ । त्रिभुवन विश्वविद्यालय, कीर्तिपुरमा आयोजित महाधिवेशन अन्तर्गत बिहीबार विद्युतीय मेसिनबाट मतदान भएको थियो ।
निर्वाचनको परिणाम अनुसार नेकपा (एमाले) निकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)को अध्यक्षमा डा. सुजन कडरिया निर्वाचित भएका छन् । उनले ७३२ मत प्राप्त गर्दै प्रतिस्पर्धी प्रकाश पौडेललाई ७ मतको फराकिलो मतान्तरले पछि पारेका हुन्। पौडेलले ७२५ मत प्राप्त गरेका थिए ।
खुला उपाध्यक्षमा विकास श्रेष्ठ ७०८ मतसहित र महिलातर्फको उपाध्यक्षमा अञ्जना सिवाकोटी ७७५ मतसहित विजयी भएका छन् ।
त्यसैगरी, महासचिव पदमा दीपक धामी ७८५ मत प्राप्त गरी निर्वाचित भए भने उपमहासचिवमा कमलले ८१६ मत प्राप्त गरे ।
चार सचिव पदमा आकाश घर्ती मगर (३६० मत), रचना सापकोटा (३०४ मत), समिम बाबु खान (२७३ मत) र गोपाल नेपाल (२६८ मत) विजयी भएका छन् ।
केन्द्रीय आयोगअन्तर्गत निर्वाचन आयोगको अध्यक्षमा जितप्रसाद सिटौला, उपाध्यक्षमा प्रविन गिरी र सचिवमा विशाल पराजुली निर्वाचित भए । लेखा आयोगको अध्यक्षमा अञ्जली लम्साल, उपाध्यक्षमा समीक्षा ढकाल र सचिवमा गगनसिंह बस्नेत विजयी भएका छन् ।
अनुशासन आयोगको अध्यक्षमा सुमन घिमिरे, उपाध्यक्षमा आकाश गिरी र सचिवमा स्मृति अधिकारी निर्वाचित भए । नीति, योजना तथा अनुसन्धान आयोगतर्फ अध्यक्षमा प्रकाश विष्ट, उपाध्यक्षमा योगेश बम र सचिवमा विष्णु पाण्डे विजयी भएका छन् ।
महाधिवेशनमा १,५५१ मतदातामध्ये १,४५० मत खसेका थिए । चुनाव विद्युतीय प्रणालीमार्फत सम्पन्न गरिएको थियो ।
