काठमाडौं । अमेरिकाबाट डिपोर्ट गरिएका मरिव तीन दर्जन नेपाली आज काठमाडौं आइपुग्ने भएका छन् । इमिग्रेसन कानुन उल्लंघन गरेको भन्दै अमेरिकाले उनीहरुलाई डिपोर्ट गरेको बताइएको छ।
अध्यागमन कार्यालयका अनुसार नेपाली सवार अमेरिकी चार्टर्ड विमान आइतबार अपराह्न साढे चार बजे त्रिभुवन अन्तर्राष्ट्रिय विमानस्थलमा अवतरण गर्ने छ । त्रिभुवन अन्तर्राष्ट्रिय विमानस्थल अध्यागमन कार्यालयका प्रवक्ता अञ्जन न्यौपानेले अमेरिकाबाट डिपोर्ट भएका नेपाली आज अपराह्न काठमाडौं आउन लागेको पुष्टि गरे ।
अमेरिकाले चार्टर्ड गरेको विमान डिपोर्ट गरिएका विभिन्न देशका नागरिकलाई छाड्दै अपराह्न साढे चार बजे काठमाडौं आइपुग्ने बताइएको छ । राष्ट्रपति डोनाल्ड ट्रम्पले पछिल्लोपटक सत्ता सम्हालेपछि अमेरिकी सरकारले आप्रवासीहरुमाथि कडाइ गर्ने नीति लिएको छ ।
भिसा प्रक्रिया पूरा नगरेका, भिसा अवधि सकिएर पनि बसेका र चालचलन राम्रो नभएकाहरुलाई अमेरिकाले नियन्त्रणमा लिएर सम्बन्धित देश फर्काइरहेको छ । अमेरिकाले सोही नीति अनुसार नेपालीलाई पनि डिपोर्ट गर्दै आएको छ ।
ट्रम्प दोस्रोपटक राष्ट्रपति बनेपछि हालसम्म १४० जना नेपालीलाई अमेरिकाले डिपोर्ट गरिसकेको छ । डिपोर्ट हुनेहरुमा दलाललाई मोटो रकम बुझाएर अवैध रुपमा अमेरिका प्रवेश गर्नेहरु धेरै रहेको जनाइएको छ ।
