काठमाडौं । नेपाल प्रहरीले भिजिट भिसामा एकजना पीडितलाई कुवेत पुर्याई मानव बेचबिखन गरेको अभियोगमा पक्राउ गरी आज सार्वजनिक गरेको छ ।
पक्राउ पर्नेमा मोरङको रङ्गेली नगरपालिका–३ का ५७ वर्षीय कृष्ण अधिकारी भन्ने झयन्द्रकुमार अधिकारी रहेको केन्द्रीय प्रहरी प्रवक्ता एवं प्रहरी नायब महानिरीक्षक दानबहादुर कार्कीले जानकारी दिनुभयो । उनले भने, “बेचबिखन गरेको भन्ने पीडितको उजुरीका आधारमा मानव बेचबिखन अनुसन्धान ब्यूरोको टोलीले बुधबार ललितपुर महानगरपालिका–२४ बाट निजलाई पक्राउ गरेको हो ।”
अधिकारीले पीडितलाई दुबईको कम्पनीमा मासिक तलब ४० हजार रुपैयाँसम्म हुने काममा लगाइदिने प्रलोभन देखाई रु दुई लाख नगद लिई दुबईमा अर्का अभियुक्तले भेट गरी आफू बस्ने कोठामा लगि बन्धक बनाई घरेलु काममा लगाई यौनशोषण गरी जबरजस्ती गर्भपतनसमेत गराएको पीडितको आरोप छ ।
यसैगरी, युएईमा भन्दा कुबेतमा राम्रो तलब हुन्छ भनेर २०८० साल वैशाख २८ गते दुबईबाट कुवेत पुर्याई सो एजेन्टले अर्कोलाई जिम्मा लगाएको र निजले पीडितलाई बन्धक बनाई श्रम र यौन शोषणसमेत गरेको प्रारम्भिक अनुसन्धानको क्रममा खुल्न आएको प्रवक्ता कार्कीले बताए । पीडितले नेपाल फर्काइदिन अनुरोध गर्दा ६ लाख ७५ हजार रुपैयाँ रकम बुझाउन भनेपछि आफन्तमार्फत उक्त रकम बुझाई २०८० साल मङ्सिर ३ गते नेपाल फर्कन सफल भएका प्रहरीले जनाएको छ ।
पक्राउ परेका अधिकारीमाथि मानव बेचबिखन तथा ओसारपसार मुद्दामा जिल्ला अदालत काठमाडौंबाट पाँच दिन म्याद थप अनुमति लिई आवश्यक अनुसन्धान सुरु गरिएको प्रवक्ता कार्कीले जानकारी दिए ।
