रुकुमपश्चिम । रुकुमपश्चिममा गएराति आएको बाढीले घर बगाउँदा पुरिएका तीन बालिकाको ज्यान गएको छ । थप एक जना वेपत्ता भएका छन् भने सात जना घाईते भएका छन् ।
जिल्लाको आठविसकोट नगरपालिका १२ को झिन्चौर बगरमा झिन्चौर खोलामा आएको बाढीले घर बगाउँदा तीन बालिकाको पुरिएर न्यान गएको हो । बाढीले घर बगाउँदा पुरिएर मृत्यु हुनेमा १० वर्षीया हितमाया पुन, आठ वर्षीया धनसा पुन र चार वर्षीया मनिषा सार्कीको रहेको प्रहरीले जनाएको छ ।
बाढीले घर बगाउँदा ४० वर्षीय डिल्लीबहादुर बुढाथोकी वेपत्ता भएका छन् । उनको खोजी कार्य भइरहेको जनाइएको छ । लेदोसहितको बाढीले घर पुरिएपछि डोजर लगाएर लेदो हटाउने तयारी भइरहेको छ।
बाढीमा परेर घाइते भएका सात जनाको आठविसकोट नगर अस्पतालमा उपचार भइरहेको छ । घाईते हुनेमा स्थानीय १२ वर्षीय विनय सार्की, २२ वर्षीया मनिषा पुन, २९ वर्षीय जनक खत्री, छ वर्षीया मनसरी पुन, चार वर्षीय मेक्सन पुन, २८ वर्षीया धनमाया पुन र ६५ वर्षीया कल्पना कामी रहेको प्रहरीले जनाएको छ ।
घटनाको पूर्ण विवरण सङ्कलन जारी रहेको र घटनास्थलमा सुरक्षाकर्मी, स्थानीयवासीलगायतले बेपत्ताको खोजी गरिरहेको जनाइएको छ ।
