काठमाडौं । अख्तियार दुरुपयोग अनुसन्धान आयोगले  मुख्यसचिव डा. अर्यालसहित १२ जना विरुद्ध भ्रष्टाचार मुद्दा दायर गरेको छ । सुरक्षण मुद्रण केन्द्रको बजेट विनियोजन र अन्तशुल्क स्टिकर खरिदमा अनियमितता गरेको आरोपमा अख्तियारले मुख्यसचिव डा. अर्याल लगायत १२ जना विरुद्ध भ्रष्टाचारमुद्दा दायर गरेको हो ।

आरोपपत्र दर्ता हुनासाथ मुख्यसचिव डा. अर्याल स्वतः निलम्बनमा परेका छन् । बहालवाला मुख्यसचिवमाथि भ्रष्टाचार मुद्दा लागेको नेपालको निजामति इतिहासमा यो पहिलो घटना हो । अर्यालसँग सुरक्षण मुद्रण केन्द्रबाट बर्खास्तमा परेका विकल पौडेल लगायत १२ जना विरुद्ध भ्रष्टाचार मुद्दा दायर भएको बताइएको छ ।

अर्याल सञ्चार तथा सूचना प्रविधि मन्त्रालयको सचिव हुँदा योजना छनौटका आधारभूत प्रक्रिया नै पूरा नगरी सुरक्षण मुद्रण केन्द्रका नाममा ठूलो रकम विनियोजन गर्ने काममा संलग्न रहेको अभियोग पत्रमा उल्लेख छ  । सञ्चार मन्त्रालयको वार्षिक बजेटभन्दा बढी स्रोत सुनिश्चितता पाएको सुरक्षण मुद्रण केन्द्रले त्यसपछि अन्तशुल्क स्टिकर छाप्ने काम अघि बढाउन भन्दै प्रिन्टर आयात गरेको थियो । सोहि ठेक्कामा अख्तियारले प्रश्न उठाएको हो ।