काठमाडौं । धितोपत्र बोर्डको अध्यक्षका तीन उम्मेदरवारलाई बुधबारका लागि कार्ययोजना प्रस्तुती तथा अन्तर्वार्ताका लागि बोलाइए पनि उनीहरु फेरि अनुपस्थित भएका छन् । ९ बजे बोलाइएको अन्तर्वार्तामा तीनै जना अनुपस्थित भएको हुन् ।
अध्यक्ष नियुक्तिका लागि गठित सिफारिस समितिले सर्टलिस्टमा परेका ५ जनालाई यसअघि आइतबार कार्ययोजना प्रस्तुती तथा अन्तर्वार्ताका लागि बोलाइएको थियो । आइतबार २ जना मात्रै उपस्थिति भए, बाँकी ३ जना अनुपस्थित भएपछि बुधबार ९ बजेका लागि फेरि बोलाइएको थियो ।
यसअघि लामो समयसम्म अन्यौलमा रहेको बोर्ड अध्यक्ष नियुक्ती प्रक्रियालाई अघि बढाउन छनोट समितिले ५ जनाको नाम सर्टलिस्टमा राख्दै आईतबार अन्तर्वार्ताका लागि बोलाएको थियो । तर अन्तर्वार्तामा बोलाएकामध्ये सन्तोषनारायण श्रेष्ठ र धितोपत्र बोर्डकै कार्यकारी निर्देशक मुक्ति श्रेष्ठ मात्रै उपस्थित भएका थिए ।
सर्टलिस्टमा परेकामध्ये बोर्डका कार्यकारी निर्देशक नवराज अधिकारी, नेपाल स्टक एक्स्चेन्जका सीईओ कृष्णबहादुर कार्की र बीमा समितिका पूर्वअध्यक्ष चिरञ्जिवी चापागाईं अनुपस्थित भएका हुन् ।
तर, दोस्रोपटक बोलाईएको प्रस्तुतिकरणमा पनि उनिहरु अनुपस्थित भएपछि धितोपत्र बोर्डको अध्यक्ष चयन अन्योलतातर्फ धकेलिएको छ ।
बोर्ड अध्यक्षका लागि १९ जनाले आवेदन दिएका थिए । जसमध्ये अन्तिम ५ जनामा उनीहरुको नाम छनोट भएको थियो । यिनै ५ जनाबाट छनौट समितिले ३ जनाको नाम मन्त्रिपरिषदमा सिफारिस गर्नुपर्ने थियो । जसमध्येबाट १ जना बोर्ड अध्यक्षमा नियुक्त हुने प्रावधान थियो । तर, छनोट समितिले बोलाएको प्रस्तुतीकरणमै ३ जना उपस्थित नभएपछि बोर्डको अध्यक्ष छनोट प्रक्रिया नै रद्द हुने अवस्था आएको छ ।
गत पुस २२ गते बोर्डका तत्कालिन अध्यक्ष रमेश हमाल कार्यकालका कारण बाहिरिएसँगै हालसम्म उक्त पद रिक्त रहेको छ ।
