काठमाडौं । जापानमा जारी २०औँ एसियाली खेलकुदअन्तर्गत पुरुष क्रिकेटमा नेपालले अफगानिस्तानमाथि ५ विकेटको शानदार जित निकालेको छ । जापानको आइचीस्थित कोरोगी स्पोर्ट्स पार्कमा भएको खेलमा अफगानिस्तानले दिएको १०३ रनको लक्ष्य नेपालले १७.२ ओभरमा ५ विकेट गुमाएर पूरा गरेको हो ।
नेपालको जितमा सन्दीप जोराले सर्वाधिक ३४ रन बनाए । कप्तान रोहित पौडेल ३३ रनमा अविजित रहे भने दीपेन्द्रसिंह ऐरीले १५ रनको योगदान दि ए।
यसअघि टस जितेर पहिले ब्याटिङ गरेको अफगानिस्तानले निर्धारित २० ओभरमा ७ विकेट गुमाउँदै १०२ रन बनाएको थियो । उसका लागि फेसल शिनोजादाले ३३, नजिबुल्लाह जाद्रानले ३० र नङ्गेलिया खरोटेले १७ रन बनाए ।
बलिङतर्फ नेपालका कुशल भुर्तेलले ४ तथा ललित राजवंशीले ३ विकेट लिए ।
नेपाल समूह ‘ए’ मा अफगानिस्तान र आयोजक जापानसँगै रहेको छ । अफगानिस्तानले यसअघि जापानलाई पराजित गरिसकेको छ । नेपालले समूह चरणको अन्तिम खेल शनिबार जापानसँग खेल्नेछ । समूहका शीर्ष दुई टोली क्वार्टरफाइनलमा पुग्नेछन्, जहाँ नेपालले भारत वा श्रीलंकामध्ये एक टोलीसँग प्रतिस्पर्धा गर्ने सम्भावना छ ।
यसअघि भएको एसियाली खेलकुदमा पनि नेपाल क्वार्टरफाइनल पुगेको थियो, जहाँ भारतसँग पराजित भएको थियो ।
