काठमाडौं । अमेरिकाको उत्तर–पूर्वी क्षेत्रमा आएको शताब्दीकै सबैभन्दा शक्तिशाली र खतरनाक हिउँदे आँधीका कारण जनजीवन अस्तव्यस्त बनेको छ । भीषण हिमपात, ठिही र वर्षाले धेरै राज्यहरूमा ठूलो क्षति पुर्याउँदा हालसम्म कम्तीमा २९ जनाको मृत्यु भएको छ। यो आँधीले अर्कानासदेखि न्यु इंल्यान्डसम्मको करिब २१०० किलोमिटर क्षेत्रमा एक फिटभन्दा बढी हिउँ जमेको छ, जसका कारण सडकमा सवारी साधनहरू अलपत्र परेका छन् ।
हजारौँ उडानहरू रद्द भएका छन् भने शिक्षण संस्थाहरू बन्द गरिएका छन् । मौसम विभागका अनुसार पिट्सबर्गको उत्तरी क्षेत्रमा २० इन्चसम्म हिउँ परेको छ । तापक्रम माइनस ३१ डिग्री सेल्सियससम्म पुगेको छ । न्युयोर्क सहरमा पछिल्ला वर्षको तुलनामा उच्च हिमपात रेकर्ड गरिएको छ । सेन्ट्रल पार्कमा मात्रै ११ इन्च हिउँ जमेको छ ।
मुख्य सडकहरू सफा गरिए पनि फुटपाथमा मानिसहरू घुँडासम्मको हिउँमा हिँड्न बाध्य छन् । मेट्रो सेवामा समेत ढिलाइ भएको छ । दक्षिणी राज्यहरूको अवस्था झनै भयावह देखिएको छ । त्यहाँ हिउँसँगै ‘फ्रिजिङ रेन’ भएका कारण रुख र बिजुलीका पोलहरू ढल्दा ७ लाख ५० हजारबढी घरहरू अन्धकारमा परेका छन् । विशेषगरी मिसिसिपी र टेनेसीका बासिन्दा विजुलीविहीन भएर कठ्यांग्रिदो जाडोमा बस्न बाध्य छन् ।
मिसिसिपीमा सन् १९९४ पछिकै यो सबैभन्दा भयानक आँधी मानिएको छ । मिसिसिपी विश्वविद्यालयलाई हप्ताभरिका लागि बन्द गरिएको छ । न्युयोर्कमा अत्यधिक चिसोका कारण आठजनाको मृत्यु भएको छ । म्यासाचुसेट्स र ओहायोमा हिउँ सफा गर्ने मेसिनले किचेर दुईजनाको ज्यान गएको छ । अर्कानास र टेक्ससमा हिउँमा खेलिने खेलका क्रममा दुई किशोरको मृत्यु भएको छ । कान्सासमा एक २८ वर्षीया शिक्षिकाको शव हिउँमा पुरिएको अवस्थामा भेटिएको छ ।
लुइजियाना, पेन्सिलभेनिया र टेनेसीमा तीनरतीनजना, मिसिसिपीमा दुई र न्युजर्सीमा एकजनाको मृत्यु भएको छ । अमेरिकाका ४८ मुख्य राज्यहरूको औसत न्यूनतम तापक्रम माइनस १२।३ डिग्री सेल्सियस रहने अनुमान छ, जुन २०१४ पछिकै सबैभन्दा कम रहेको बताइएको छ । हवाई सेवामा पनि यसले ऐतिहासिक असर पारेको छ । एकै दिन आठ हजारभन्दा बढी उडानहरू ढिला वा रद्द भएका छन् ।
आइतबार मात्रै अमेरिकाका ४५ प्रतिशत उडानहरू रद्द गरिएका थिए, जुन कोरोना महामारीपछिको सबैभन्दा ठूलो संख्या हो ।
टेनेसीको न्यासभिलमा बिजुली नभएपछि धेरै मानिसहरू होटेलमा शरण लिन पुगेका छन् । कतिपयले आफ्ना साना बालबालिकाका लागि दूध सुरक्षित राख्न मात्रै पनि होटेलमा कोठा लिनुपर्ने बाध्यता आएको बताएका छन् ।
यसैबीच, राष्ट्रपति डोनाल्ड ट्रम्पले यो संकटपूर्ण स्थितिलाई नजिकबाट नियालिरहेको ह्वाइट हाउसकी प्रेस सचिव क्यारोलिन लेविटले जानकारी दिएकी छिन् । राष्ट्रपति ट्रम्पले २४ घण्टाभित्रै अर्कानास, जर्जिया, केन्टकी, मिसिसिपी र टेनेसीलगायत १२ राज्यका लागि संघीय आपतकालीन विपद् घोषणालाई स्वीकृति दिएका छन् ।
यो घोषणाले प्रभावित राज्यहरूलाई राहत कार्य, विद्युत सेवा पुनः सञ्चालन र सडक सफाइका लागि आवश्यक संघीय संसाधन र कोषमा पहुँच पुर्याउने बताइएको छ । ह्वाइट हाउसले आगामी दिनमा प्रभावित राज्यका गभर्नर र स्थानीय अधिकारीहरूसँग निरन्तर समन्वय गरिरहने जनाएको छ । एपी
