काठमाडौं । आजदेखि देशभर अस्वाभाविक मनसुनी वर्षा हुने भएकाले नदी जलाधार क्षेत्रको मानव बस्तीमा सतर्कता अपनाउन विज्ञहरूले आग्रह गरेका छन् ।
बङ्गालको खाडीबाट प्रवाह हुने जलवाष्पयुक्त हावाका साथै त्यस क्षेत्रमा बनेको न्यून चापीय प्रणालीको प्रभावका कारण आउँदो आइतबारसम्म मेघगर्जन र चट्याङसहित ठूलो र केही ठाउँमा अति ठूलो वर्षा हुने पूर्वानुमान छ । वर्षाको यो पूर्वानुमानलाई विज्ञहरूले सामान्य मनसुनी वर्षाभन्दा फरक चरित्रको रहेको भन्दै उच्च सतर्कता अपनाउनुपर्नेमा जोड दिएका हुन् ।
जलवायु तथा विपद् विज्ञ डाक्टर धर्मराज उप्रेतीले विशेष गरेर नदी जलाधार क्षेत्रमा मुसलधारे वर्षा हुनसक्ने भएकाले जलाधार तटीय क्षेत्र र आसपासका राजमार्गमा 'फोर्स इभ्याकुएशन' अर्थात् सरकारी निकायले हानि/नोक्सानी रोक्न बल प्रयोग गरेर बस्ती खाली गर्ने वा गाडी सञ्चालनमा रोक लगाउनुपर्ने अवस्थासम्म आउन सक्नेतर्फ सचेत गराए । यस्तै उनले धान भित्र्याउनेसमय पनि भएकाले काटिसकेको धान आज दिउँसोसम्म थन्क्याउन र नकाटेको धानलाई आइतवारसम्म यथास्थितिमा नै राख्न पनि सुझाव दिएका छन् ।
त्यसैगरी अत्यावश्यकबाहेकको लामो यात्रा नगर्न पनि विज्ञहरूले सुझाव दिएका छन् । जलवायु तथा विपद् विज्ञ उप्रेतीले ठूलो वर्षाले बाढी, पहिरो र डुबानको समस्या निम्त्याउने भएकाले यसबाट हुनसक्ने हानि/नोक्सानी कम गर्न सरोकारवाला निकायसँगै सर्वसाधारण पनि सचेत हुनुपर्नेमा जोड दिए ।
मौसम विज्ञान विभागले ५६ वटा जिल्लामा वर्षाको 'रेड अर्लट' जारी गरिसकेको छ ।
