काठमाडौं । आज असोज १० गते बिहीवारदेखि काठमाडौं उपत्यकामा ल्याउने भनिएको मेलम्चीको पानी अन्तिम अवस्थामा आएर रोकिएको छ । स्थानियवासीले आफ्ना मागहरु राखेर विरोध प्रदर्शन गर्न थालेपछि आजदेखि काठमाडौं ल्याउने भनिएको मेलम्चीको पानी रोकिएको हो ।
यसअघि दुई साताअघि नै एउटा सूचना प्रकाशित गर्दै मेलम्ची खानेपानी विकास समितिले असोज १० गते बिहीवारदेखि काठमाडौंमा मेलम्चीको पानी ल्याउने घोषणा गरेको थियो ।
स्थानियवासी तथा बाढी प्रभावितहरुले आफ्ना माग पूरा नगरे मुहानमा कामै गर्न नदिने अडान लिएपछि समितिले मेलम्चीको पानी काठमाडौं ल्याउने अभियान तत्कालका लागि रोकिएको जनाएको छ ।
स्थानीय वासिन्दा तथा बाढी प्रभावितहरुले बुधवार मेलम्चको मुहान क्षेत्रमा प्रदर्शन गर्दै आफ्ना माग पूरा नभए पानी लैजान नदिने घोषणा गरेका छन् । प्रदर्शनमा उत्रिएकाहरुले आफ्नो बाँकी भुक्तानी दिनु पर्ने मुख्य माग राखेका छन् । उनीहरुले राहत र पुनःस्थापना तथा स्थानीय सप्लायर्सले सुरुङ निर्माण गर्दा–गर्दै ठेक्का तोडेर फर्किएको इटालियन कम्पनीले बाँकी भुक्तानी दिनुपर्ने माग राखेका हुन् ।
समितिले समयमै मुहानमा पुगेर काम थाल्न नसकेको, स्थानीयवासीको अवरोध तथा मनसुन सक्रिय भैरहेकाले मेलम्चीको पानी काठमाडौं ल्याउने कार्य अनिश्चित बनेको बताएको छ ।
