काठमाडौं । सुनसरीको इटहरीस्थित यातायात व्यवस्था कार्यालयमा बिचौलिया भइ ठगी गरेको आरोपमा नेपाल प्रहरीले १७ जनालाई पक्राउ गरेको छ ।
कार्यालय बाहिर बसेर बिचौलियाले अत्यधिक दुःख दिने गरेको गुनासो आएपछि सुनसरीका प्रमुख जिल्ला अधिकारी (प्रजिअ) रामचन्द्र तिवारीसहितको टोलीले यातायात कार्यालयमा बुधवार अनुगमन गरेको थियो ।
यसपछि सेवा लिन आउने ग्राहकसँग अतिरिक्त पैसा असुल्ने र कार्यालयका महत्वपूर्ण कागजात लेखापढी सेन्टरको सटरमा पुर्याएर मिलेमतो गर्ने १७ जना बिचौलियालाई मंगलवार पक्राउ गरिएको प्रजिअ तिवारीले बताए ।
पक्राउ पर्नेमा यातायात कार्यालय बाहिर फोटोकपी लगायतका पसल थापेर बस्ने बिचौलियाहरू रहेको प्रहरीले जनाएको छ । उनीहरूमाथि थप अनुसन्धान शुरू गरेको इटहरी प्रहरीले जनाएको छ ।
पक्राउ गर्नेहरूको नाम भने प्रहरीले सार्वजनिक गरेको छैन ।
