काठमाडौं । असार अन्तिम साता सिमलतालको पहिरोले बगाएर त्रिशुली नदीमा हराइरहेका दुई बस र यात्रुहरुको खोजीका लागि सरकारले चीनको पनि सहयोग माग्ने भएको छ । बुधबार बसेको संसदको राज्य व्यवस्था तथा सुशासन समितिको बैठकमा गृहसचिव एकनारायण अर्यालले यसबारे जानकारी दिएका हुन् ।
एक सातासम्म खोजी गर्दा पनि नभेटिएपछि भारतीय टोली केही दिनअघि मात्रै फिर्ता गएको थियो । गृह मन्त्रालयले अब चीन सरकारसँग पनि खोजीका लागि अनुरोध गरिरहेको जनाएको छ ।
चितवनको सिमतालमा गत असार २८ गते लेदोसहितको पहिरोमा परी दुई वटा यात्रुवाहक बस बेपत्ता भएका थिए । बसमा सवार ६५ यात्रुमध्ये ३ जना पौडिएर बाहिर निस्किएका थिए भने हालसम्म २४ वटा शव भेटिएको छ । अन्य यात्रु र बस अझै भेटिएको छैन ।
