काठमाडौं । धार्चे गाउँपालिका–५ गुम्दास्थित रेसे फााटमा आइतबार पहिरोमा परी बेपत्ता भएकामध्ये एक जना मृत भेटिएका छन् । पहिरोले बगाएको घरभन्दा करिब २०/२५ मिटरतल एक जनाको शव भेटिएको प्रहरीले जनाएको छ ।
शव पहिरोले पुरिएको अवस्थामा भेटिएको जिल्ला प्रहरी कार्यालय गोरखाले जनाएकाे छ । ६० वर्षीय सुलाल कान्छा गुरुङको शव रहेको प्रहरीले जनाएको छ । पहिरो स्थलमा एक जनाको शव भेटिएको र अहिले मुचुल्का उठाउने काम भइरहेको जनाइएकाे छ ।
पहिरोमा परी बेपत्ता अन्यको भने खोजी भइरहेको छ । आइतबार बिहान करिब २ बजेतिर खसेको पहिरोमा परी ५ जना बेपत्ता भएका थिए । नेपाल प्रहरी, सशस्त्र प्रहरी, नेपाली सेना र स्थानीयले बेपत्ता बनेकाहरूको सोमबार बिहानैबाट खोजी भइरहेको छ ।
लेदो रहेको क्षेत्रफल ठूलो रहेकाले जेसीभीको सहायताले पनि बेपत्ताहरूको खोजी गरिएको छ । रेसे फााटमा गएको पहिरोमा परी घाइते बनेका दुई जनाको भने आइतबार नै उद्धार गरिएको छ । धार्चे गाउँपालिका–५ का सुलाल कान्छा गुरुङ, उनका छोरा जितबहादुर गुरुङ, बुहारी कान्छी गुरुङ, धार्चे–५ का रमेश गुरुङ र आरुघाट गाउँपालिकाका रमेश परियार बेपत्ता भएका थिए । बेपत्ता भएका ५ र घाइते दुई गरी सातैजना वाटर इनर्जी हाइड्रो पावरमा आबद्ध कर्मचारी, कामदार तथा निर्माण व्यवसायी रहेको धार्चे गाउँपालिकाले जनाएको छ ।
