काठमाडौं । ख्यातिप्राप्त लोकगायक एलपी जोशी (लक्ष्मीप्रसाद जोशी) को ८८ वर्षको उमेरमा निधन भएको छ । विर्तामोढस्थित अस्पताल लैजाँदै गर्दा जोशीको बिहीबार साँझ झापामा निधन भएको परिवारले जनाएको छ ।
वि.सं.१९९३ सालमा धनकुटा ६ बिचबजारमा जन्मिएका जोशीले जीवनभर लोकसंस्कृतिको क्षेत्रमा योगदान पुर्याएका थिए । बेलुकी परिवारसँग खाना खाएका जोशी सामान्य अवस्थामा रहेकोमा अकस्मात बिरामी परेर निधन भएको जनाइएको छ । उनका निकट रहेका कवि धनकुटे कान्छाका अनुसार झापाको दमकस्थित घरमा रहेका जोशी बेलुकीको खाना खाएपछि अकस्मात बेहोस भएका थिए । उनलाई अस्पताल पुर्याएलगत्तै चिकित्सकले मृत घोषणा गरेका थिए ।
जोशीका रेडियो नेपालमा रेकर्ड ४५ मध्ये अधिकांश गीत अझै पनि सर्वसाधारणले गुनगुनाउने गर्छन् । उनले २०१३ सालमा पहिलो गीत रेकर्ड गराएका थिए । ‘नेपालको माया, नेपाल कस्तो छ’ बोलको उक्त गीतले त्यसताका राम्रै जमेको जोशीले केही समय अगाडिको भेटमा सुनाएका थिए ।
२०२० साल पहिल्यै अधिकांश गीत रेकर्ड भएका थिए । २०२२ देखि २०२९ सालसम्म रेडियो नेपालमा जोशी र जनकवि केशरी धर्मराज थापाका गीतले एकछत्र राज गरेको थियो । २०११ सालदेखि थापासँग नजिकिएका उनी गाउॅ बस्तीका मौलिक गीतको खोजीमा जुट्दै हिँडे । त्यसै मेसोमा रिटिङ रिटिङ...बोलको गीत संकलन गरियो । २०५३ सालमा आइपुग्दासम्म म्युजिक नेपालबाट रिटिङ रिटिङ नामको गीति एल्बम निकालेका थिए ।
उनैले गाएको अर्को लोकप्रिय ‘वल्लो खोलो हो पल्लो खोलो कमिलाको गोलो भनेर...’ बोलको गीतले धेरैको मन जितेको थियो । २०१९ सालमा तत्कालीन राजा महेन्द्रलाई उनले गीत सुनाएका थिए । जोशी हार्मोनियम र तबला बजाउन निपूर्ण थिए । गृहजिल्ला धनकुटामा आफ्ना समकक्षी गायक तथा सांस्कृतिककर्मीको अभाव भएपछि भौतारिंदै कहिले चितवन त कहिले राजधानीतिर लागे । तर मन बहलाउन सकेनन् । अन्त्यमा झापा झरेका जोशी दमकलाई कर्मथलो बनाउॅदै गीत/संगीत साधनामा तल्लिन थिए ।
जोशीको दाहसंस्कार झापाको कन्काइ माइमा शुक्रबार ११ बजे गरिने जनाइएको छ । उनी छोरा मिलन र परिवारका सदस्यका साथ दमकमा रहेका थिए ।
