काठमाडौं । पर्सा जिल्लाकी आयुषा कापरीले पाइलट तालिम पूरा गरेसँगै जिल्लाकै सबैभन्दा कान्छी पाइलटका रूपमा नयाँ कीर्तिमान स्थापित गरेकी छन्। उनको सफलतालाई नेपाली उड्डयन क्षेत्रमा महिलाको बढ्दो उपस्थिति र क्षमताको उदाहरणका रूपमा हेरिएको छ।
संयुक्त राज्य अमेरिका (अमेरिका) बाट पाइलट अध्ययन पूरा गरेकी कापरीले आधुनिक प्रविधि, कडा अनुशासन र उच्च सुरक्षा मापदण्डअनुसारको प्रशिक्षण सफलतापूर्वक सम्पन्न गरेकी हुन्। अन्तर्राष्ट्रिय स्तरको प्रतिस्पर्धात्मक वातावरणमा तालिम लिँदै उनले उड्डयन पेशामा आवश्यक प्राविधिक र मानसिक दक्षता हासिल गरेकी बताइन्छ।
वि.सं. २०६१ साल असार १५ गते वीरगञ्जमा जन्मिएकी कापरीले सानैदेखि पाइलट बन्ने लक्ष्य बनाएकी थिइन्। निरन्तर अभ्यास, अनुशासन र लक्ष्यप्रतिको प्रतिबद्धताका कारण उनले कम उमेरमै पाइलट कोर्स पूरा गर्न सफल भएकी हुन्।
सामान्य पारिवारिक पृष्ठभूमिबाट आएकी कापरीका पिता बिरेन्द्र कापरी नेपाल आयल निगममा बाउजर अपरेटरका रूपमा कार्यरत छन्। सीमित स्रोतसाधन भए पनि परिवारको भरोसा, साथ र प्रोत्साहनले उनको अध्ययन र करिअर यात्रामा महत्वपूर्ण भूमिका खेलेको देखिन्छ।
त्यस्तै, उनको सफल यात्रामा मामा उमेश धिमालको सहयोग उल्लेखनीय रहेको बताइन्छ। नेपाल आयल निगमअन्तर्गत एभिएसन फ्युल डिपो, सिनामंगलमा कार्यरत धिमालबाट पाएको उड्डयन क्षेत्रसम्बन्धी अनुभव, मार्गदर्शन र व्यावहारिक सुझावले आफूलाई अघि बढ्न सहयोग पुगेको कापरीले बताएकी छन्।
भौगोलिक रूपमा कठिन मानिने नेपालमा हवाई सेवा अत्यन्त महत्वपूर्ण छ। यस्तो अवस्थामा दक्ष, अनुशासित र जिम्मेवार पाइलटहरूको माग बढ्दै गएको छ। पर्सा जिल्लाकी सबैभन्दा कान्छी पाइलटका रूपमा आयुषा कापरीको उपलब्धिले उड्डयन क्षेत्रमा महिलाको सहभागिता थप विस्तार हुने अपेक्षा गरिएको छ।
उनको सफलतालाई व्यक्तिगत उपलब्धिमा सीमित नराखी देशभरका युवतीहरूका लागि प्रेरणाका रूपमा लिइएको छ। निरन्तर मेहनत, पारिवारिक सहयोग र आत्मविश्वासले ठूलो सपना पनि पूरा गर्न सकिन्छ भन्ने सन्देश उनको यात्राले दिएको छ।
