काठमाडौं । नेपाल आयल निगम लिमिटेडको ५६ औं वार्षिकोत्सवको पूर्व सन्ध्यामा खुल्ला रक्तदान कार्यक्रम आयोजना गरिएको छ । निगमको केन्द्रीय कार्यालय बबरमहलमा बुधबार आयोजना गरिएको रक्तदान कार्यक्रममा १६७ जनाले रक्तदान गरे ।
नेपाल रेडक्रस सोसाइटी, केन्द्रीय रक्तसञ्चार सेवाको प्राविधिक सहयोगमा सञ्चालन गरिएको कार्यक्रममा निगमका कर्मचारी, कर्मचारी परिवार, बबरमहल क्षेत्रका अन्य कार्यालयका कर्मचारी तथा निगम सम्बध्द अन्य व्यक्तिहरूले रक्तदान गरेका थिए । नगमका प्रबक्ता मनोज ठाकुरका अनुसार, विगत देखि नै निगमले प्रत्येक वार्षिकोत्सवको पूर्वसन्ध्यमा रक्तदान कार्यक्रम आयोजना गर्दै आई रहेको छ ।
निगमले आफ्नो व्यावसायिक जिम्मेवारीका साथसाथै सामाजिक उत्तरदायित्व अन्तर्गत यस्ता मानवीय कार्यहरूलाई निरन्तरता दिदै आएको ठाकुरको भनाइ छ।
रक्तदान कार्यक्रमको शुभारम्भ गर्दै निगम सञ्चालक समितिका अध्यक्ष डा। रामप्रसाद घिमिरेले रगतको अभावमा कसैले पनि ज्यान गुमाउनु नपरोस् भन्ने हेतुले यस्ता कार्यक्रमहरु निरन्तर भइरहनुपर्नेमा जोड दिए । निगमले यस प्रकारको रक्तदान कार्यक्रम नियमित गर्दै जान घिमिरेले निगमलाई सुझाव दिए ।
निगमका कार्यकारी निर्देशक डा. चण्डीका प्रसाद भट्टको अध्यक्षतामा सम्पन्न रक्तदान कार्यक्रमका संयोजक नायव कार्यकारी निर्देशक नागेन्द्र साहले समय समयमा देखिने गरेको रगतको अभावलाई कम गर्न सबै स्वस्थ व्यक्तिले नियमित रूपमा रक्तदान गर्न आग्रह गरे ।
