काठमाडौं । आपराधिक लाभको मुद्दामा मुछिएकी निलम्बित प्रहरी इन्स्पेक्टर विनु शाहीलाई जिल्ला प्रहरी परिसर ललितपुरको हिरासतमा पठाइएको छ । प्रहरीको फरार सूचीमा रहेकी शाही आइतबार निवेदन साथ ललितपुर जिल्ला अदालतमा उपस्थित भएकी थिइन् । तर बयानको क्रम जारी नै रहेकाले उनलाई जिल्ला प्रहरी परिसर ललितपुरको थुनामा पठाइएको हो ।
ललितपुर जिल्ला अदालतका सूचना अधिकारी रामसजीवन महतोका अनुसार अदालतमा बयानको क्रम नसकिएकाले हेर्दाहेर्दैमा राखी जिल्ला प्रहरी परिसर ललितपुरको जिम्मा लगाइएको हो ।
शाहीलाई पक्राउ गर्न प्रहरीले सर्वाधिक खोजतलास गर्दै आएको भए पनि हालसम्म फेला पार्न सकेको थिएन । उनी प्रहरीलाई चक्मा दिँदै सुटुक्क अदालत पुगेकी हुन् ।
न्यायाधीश रीताकुमारी बख्रेलको इजलासमा उनको बयान चलिरहेको छ ।
इन्द्रकुमार राईको जाहेरीले भीमादेवी थापासहित ६ जनाविरुद्ध आपराधिक लाभको मुद्दा दायर भएको थियो । सोही मुद्दामा शाही फरार थिइन् ।
प्रहरी प्रभाग भैँसेपाटीमा कार्यरत रहेको बेला उनले एक व्यवसायीलाई बलात्कार मुद्दामा फसाइदिने भन्दै हनिट्र्याप समूहसँग मिलेर रकम असुलेको आरोप छ ।
