काठमाडौं । क्रिप्टोकरेन्सी बिटक्वाइनको मूल्य १ लाख अमेरिकी डलर नाघेको छ । बिहीबार बिटक्वाइनको मूल्य १ लाख ३ हजार अमेरिकी डलर पुगेको छ ।
हिजोको तुलनामा यो ४.६७ प्रतिशतले बढेको हो । पछिल्लो एक महिनायता बिटक्वाइनको मूल्य उच्च दरमा बढेको छ । बिटक्वाइनलाई स्वीकार गर्ने कम्पनीहरुको संख्या बढ्दै गएपछि क्रिप्टो करेन्सीको मूल्य पनि आकाशिएको हो ।
एक महिनाकै अवधिमा बिटक्वाइनको मूल्य करिब ४७ प्रतिशत बढेको छ । अमेरिकाको ४७औं राष्ट्रपतिमा डोनल्ड ट्रम्प निर्वाचित भएदेखि नै बिटक्वाइनको मूल्य उच्च दरमा बढिरहेको छ ।
यसअघि ट्रम्पले अमेरिकालाई ‘बिटक्वाइन र क्रिप्टोकरेन्सीको राजधानी बनाउने बाचा गरेका थिए । सो बाचाअनुरुप नै ट्रम्पले आयोगमा फेरबदल गर्न लागेको अनुमान गरिएको छ ।
बिटक्वाइनका अलवा पछिल्लो एक महिनामा अन्य क्रिप्टोकरेन्सीको भाउ पनि बढेको छ । इथरियमको भाउ ३ हजार ८९८ अमेरिकी डलर पुगेको छ । एक महिनामै इथेरियमको भाउ ६० प्रतिशत बढेको छ ।
