काठमाडौं । आईसीसी विश्वकप लिग–२ अन्तर्गत ओमानविरुद्धको खेलमा नेपालले २६४ रनको लक्ष्य दिएको छ । अल अमिरातमा जारी खेलमा टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाएर २६३ रन बनाएको हो ।
नेपालका लागि कप्तान रोहित पौडेलले अर्धशतकीय इनिङ्स खेले । उनले ६७ बलमा ६१ रन बनाए । त्यस्तै, करण केसीले अन्तिमतिर आक्रामक ब्याटिङ गर्दै नेपालको योगफल उकासे । उनले मात्र १६ बलमा ४ छक्का र १ चौकाको मद्दतमा अविजित ४० रन जोडे ।
नेपालका लागि अर्जुन कुमालले ४० रन बनाउँदा इर्शान पाण्डे र बसिर अहमदले समान ३७–३७ रनको योगदान दिए । दीपेन्द्र सिंह ऐरीले २२ रन जोडे ।
बलिङतर्फ ओमानका शकिल अहमद, करण सोनाभेल र शाह फैसलले समान २–२ विकेट लिए । हसनइन शाहले १ विकेट हात पारे ।
नेपालले दिएको २६४ रनको लक्ष्य पछ्याउँदै ओमान अब ब्याटिङमा उत्रनेछ ।
