काठमाडौं । बागमती प्रदेशभरबाट नेपाली कांग्रेसको तर्फबाट प्रतिनिधिसभा सदस्य जित्ने एक्ला सांसद ईन्जिनीयर मोहन आचार्य बनेका छन् ।
जेनजी आन्दोलनपछि बनेको सुशीला कार्की नेतृत्वको सरकारले फागुन २१ गते सम्पन्न गरेको प्रतिनिधिसभा सदस्य निर्वाचनमा देशभर कमजोर नतिजा निकालेको कांग्रेसले बागमती प्रदेशमा एक सिटमात्र जित्न सफल भएको हो ।
बागमती प्रदेशभर राष्ट्रिय स्वतन्त्र पार्टी (रास्वपा)को उम्मेदवारका पक्षमा नतिजा आएको बेलामा रसुवा जिल्लाबाट १० हजार ६५६ मतका साथ इन्जिनीयर आचार्यले तेस्रोपटक सांसद बनेर ह्याट्रिक गरेका हुन् । उनका प्रतिस्पर्धी राष्ट्रिय स्वतन्त्र पार्टीका बसन्त भट्टले पाँच हजार ५७१ मत प्राप्त गरे ।
बागमती प्रदेशभरका ३३ क्षेत्रमध्ये ३१ क्षेत्रमा रास्वपा, एक क्षेत्रमा नेपाली कम्युनिष्ट पार्टी र एक क्षेत्रमा कांग्रेसको उम्मेदवार निर्वाचित भएका हुन् । उक्त प्रदेशमा नेकपा (एमाले)ले भने जीत हाँसिल गर्न सकेन ।
रसुवाको उत्तरगया गाउँपालिकास्थित लहरेपौवामा विस २०३३ सालमा जन्मिएका इन्जिनीयर आचार्य विस २०४८ सालमा विद्यार्थी राजनीतिमा आवद्ध भएका थिए । उनी कांग्रेसको गत पुसमा सम्पन्न दोस्रो विशेष महाधिवेशनबाट केन्द्रीय सदस्यमा निर्वाचित भएका थिए ।
आचार्य विस २०७४ र २०७९ सालको प्रतिनिधिसभा निर्वाचनमा निर्वाचित भइसकेका छन् । विस २०७४ मा तत्कालिन नयाँ शक्ति पार्टी र विस २०७९ मा तत्कालिन नेकपा (माओवादी केन्द्र)सँग गठबन्धन हुँदा निर्वाचित भएका थिए ।
सञ्चारकर्मीसँग कुरा गर्दै सांसद आचार्यले नेपाली कांग्रेसले विशेष महाधिवेशन नगरेको भए अहिलेभन्दा पनि खराब नतिजा आउने बताए । “नेपाली कांग्रेसले विशेष महाधिवेशन नगरेको भए मैलेपनि जित्ने अवस्था रहँदैनथ्यो, पार्टी बदलिएर निर्वाचनमा गएकाले मैले सहजै जित हात पार्न सफल भयाँ,”– उनले भने ।
आचार्यले आफू र आफ्नो पार्टी नेपाली कांग्रेसले आगामी दिनमा संसदमा प्रतिपक्षको भूमिका निर्वाह गर्ने बताए ।
