काठमाडौं । नुहाउने क्रममा दुई बालिका त्रिशूली नदीमा वेपता भएका छन् । नुवाकोटको बेलकोटगढी नगरपालिका–७ स्थित त्रिशूली नदीमा नुहाउन गएका दुई बालिका बेपत्ता भएका हुन् ।
विद्यालयबाट फर्केपछि मंगलबार साँझ ६ बजेतिर नुहाउन गएका स्थानीय ११ वर्षीया जेनी डंगोल र सदीक्षा राई नदीमा डुबेर बेपत्ता भएको जिल्ला प्रहरी कार्यालय नुवाकोटले जनाएको छ ।
नदी किनारमा नुहाउने क्रममा सुरुमा एउटा बालिका डुबेपछि उनलाई बचाउने क्रममा दुवैजनालाई बगाएको सँगै नुहाउन गएका उनीहरूका साथीहरूले बताएका छन् । बगाएको सूचना पाएलगत्तै सुरक्षा टाेली र स्थानीयले खोजी कार्य थालेपनि फेला नपरेको बताइएको छ ।
