काठमाडौं । काभ्रेको मण्डन देउपुर नगरपालिका ३ खस्रे गाउँमा गुरुङ समुदायले होमस्टे संचालनमा ल्याएका छन् ।
पर्यटकहरूलाई आफ्नै बारिको उत्पादनको अर्गानिक स्वाद चखाउने र स्थानीय उत्पादनलाई प्रवर्द्धन गर्ने उद्देश्यसहित खोलिएको होमस्टेको शुक्रबार भुटानका कृषि मन्त्रीले उद्घाटन गरेका छन् ।
कुल ५१ घरधुरी गुरुङ जातीको बसोवास रहेको खस्रेमा तीन वटा निजि घरबाट सुरु गरेको होमस्टे अहिले ११ घरमा सुरु गरिएको खस्रे गुरुङ सामुदायिक होमस्टेका संस्थापक अध्यक्ष विकास गुरुङले जानकारी दिए ।
`कृषि उपार्जनलाई प्रोत्साहन गर्ने उद्देश्यसहित होमस्टे सुरु गरिएको हो, यहाँ आउने पर्यटकलाई अर्गानिक खानाको स्वाद चखाउँछौं।´ गुरुङले भने ।
उनका अनुसार होमस्टेसँगैको एक घरमा बाजे पुस्ताले प्रयोग गरेका सामानलाई संग्राहलय बनाएर राखिएको छ । संग्राहलयमा ५० भन्दा बढी सामान राखिएको छ ।
११ घरमा रहेको होमस्टेमा हाल २० देखि २५ जनालाई राख्न सकिने क्षमता छ । जसमा एक बेड रुममा दुई देखि तीन जनासम्म अटाउने क्षमता छ ।
संस्थापक अध्यक्ष गुरुङले गुरुङ भेषभुषा, रहनसहन रितिरिवाजको प्रचारप्रसार गर्ने, गुरुङ बस्तीलाई नमुना बस्तीका रुपमा स्थापित गर्ने र स्थानीयलाई अर्गानिक उत्पादनसँग जोड्दै पर्यटन प्रवर्द्धनमार्फत रोजगारीसमेत सृजना गर्ने लक्ष्य लिइएको छ ।
होमस्टेलाई `फोर बेटर परियोजना´ र मण्डन देउपुर नगरपालिकाको सहयोगसमेत छ । `फोर बेटर´ले कृषि आधुनिकतामा तालिम तथा होमस्टे संचालन गर्नका लागि स्थानीय समुदायलाई सहयोग गरेको छ ।
होमस्टेकी अध्यक्ष रिना गुरुङले होमस्टेमा आउने पर्यटकले विषादीरहित उत्पादन खान पाउने जानकारी दिइन् । यस्तै पर्यटकले होमस्टेमा आफैंले इच्छा अनुसार पकाएर खान पाउने सुविधासमेत उपलब्ध हुने उनले जानकारी दिइन् ।
होमस्टेमा कोदोको सेल, ढिडो, जाँड रक्सी, लोकल मकै, साग, सिस्नु, आलु, स्थानीय रैथाने बालीको उत्पादनको स्वाद लिन सकिने उनले जानकारी दिइन् ।
