काठमाडौं । राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछाने पोखराबाट काठमाडौं आउन लागेका छन् । पोखराको सूर्यदर्शन सहकारी ठगी प्रकरणमा बिहीबार ६५ लाख धरौटी बुझाएर छुटेका उनी शुक्रबार काठमाडौं आएर आइतबार अदालतमा उपस्थित हुन लागेका हुन् ।
आज (शुक्रबार) उनी हवाईमार्गबाट काठमाडौँ आउने तयारी थियो तर श्रीमती निकिता पौडेलसहित पार्टीका साथीको संख्या धेरै भएर हवाई टिकट नपाएपछि गाडीमै आउने भएका हुन् ।
सुरुमा लामिछानेको सचिवालयले उनी आजै काठमाडौँ जिल्ला अदालतमा उपस्थित हुने तयारी रहेको जनाए पनि गाडीमा आउनुपर्ने भएपछि अब आइतबार मात्र अदालतमा हाजिर हुने भएका छन् ।
भोलि पनि शनिबार परेकाले रवि अब पर्सि आइतबार मात्र जिल्ला अदालत काठमाडौँमा उपस्थित हुनेछन् ।
सूर्यदर्शन सहकारी ठगी प्रकरणमा धरौटी बुझाएर रिहा भए पनि काठमाडौँको स्वर्णलक्ष्मी सहकारी ठगी अभियोगमा पनि मुद्दा चलेकाले लामिछाने यहाँको जिल्ला अदालतमा हाजिर हुनुपर्ने भएको हो ।
उनीविरुद्ध रुपन्देहीको सुप्रिम सहकारी, चितवनको सहारा चितवन तथा पर्साको सानो पाइला सहकारी ठगीको पनि अभियोग छ ।
