काठमाडौं । नेपाल राष्ट्र बैंकले चालु आर्थिक वर्ष २०८१/८२ का लागि मौद्रिक नीति शुक्रबार सार्वजनिक गर्ने तयारी गरेको छ ।राष्ट्र बैंकका गभर्नर महाप्रसाद अधिकारीसहितका पदाधिकारीले यसबारे बुधबार अर्थमन्त्री विष्णु पौडेलसँग छलफल गरेकाले शुक्रबार सार्वजनिक गर्ने तयारी गरिएको हो ।
मौद्रिक नीतिका लागि सम्पूर्ण तयारी लगभग पूरा भएको जनाइएको छ । राष्ट्र बैंकले मंगलबार अन्तिमपटक बैंकर्स संघका प्रतिनिधिहरुसँग छलफल गरेको थियो । यो साता सार्वजनिक नभए अर्को शुक्रबारसम्म कुर्नै भएकाले शुक्रबार नै सार्वजनिक गर्न लागेको जनाइएको छ ।
शुत्रबार अपरान्ह सञ्चालक समितिको बैठक बस्ने र शुक्रबार सार्वजनिक गर्ने तयारी छ । राष्ट्र बैंकले गत जेठ १३ गतेदेखि मौद्रिक नीतिका लागि सुझाव माग गरेको थियो ।
यस्तै केहि उद्योगी व्यवसायीहरुले भने कर्जाको सावाँ र ब्याज तिर्न मुस्किल परिरहेकाले कर्जा बुझाउने समयावधि लम्ब्याउनुपर्ने, किस्ताको संख्या बढाउनुपर्ने, ब्याज पुँजीकरण गरिनुपर्ने तथा पुनर्कर्जाको सुविधा दिनुपर्ने माग गर्दै आएका छन् ।
