काठमाडौं । नेपाल विरुद्ध वेस्ट इन्डिज ‘ए’ ले जित हात पारेको छ । वेस्ट इन्डिज टुर अफ नेपाल सिरिज अन्तर्गतको आज भएको चौथो खेलमा वेस्ट इन्डिजले २८ रनको जित हाँसिल गरेको हो ।
टस जितेर पहिले ब्याटिङ गरेको वेस्ट इन्डिजले निर्धारित २० ओभरमा ३ विकेट गुमाएर २०९ रनको योग बनाएको थियो । जितका लागि २१० रनको लक्ष्य पछ्याएको नेपालले २० ओभरमा सबै विकेट गुमाउँदै १८१ रन मात्रै बनाएको हो ।
नेपालका तर्फबाट कप्तान रोहित पौडेलले अर्धशतक पुरा गरेका थिए । उनले ४७ बलमा ८२ रनको योग बनाएका थिए । सन्दिप जोरा, दिपेन्द्र सिंह ऐरी र गुल्सन झाले १४–१४ बलमा १९–१९ रन बनाएका थिए । अभिनाश बोहोराले ८ बलमा १७ रन र सोमपाल कामीले १० बलमा १० रन बनाए भने अन्य खेलाडीहरुले दोहोरो अंकमा रन लिन सकेनन् ।
आजको खेलमा हारेसँगै नेपालले यो सिरिजको लगातार तीन खेलमा पराजित भएको छ । पहिलो खेलमा भने नेपाल विजयी भएको थियो ।
