काठमाडौं । पूर्व प्रहरी अतिरिक्त महानिरीक्षक (एआईजी) तथा आईजीपी बन्नबाट वञ्चित भएका विश्वराज पोखरेल प्रतिनिधिसभा सदस्यमा निर्वाचित भएका छन् ।
ओखलढुंगाबाट राष्ट्रिय स्वतन्त्र पार्टीका तर्फबाट उम्मेदवार बनेका पोखरेल ५ मतान्तरले विजयी भएका हुन् ।
निर्वाचन परिणामअनुसार पोखरेलले १३ हजार ९५३ मत प्राप्त गरे । उनका निकटतम प्रतिद्वन्द्वी नेपाली कांग्रेसका कुमार लुईटेलले १३ हजार ९४८ मत ल्याएका छन् ।
जम्मा ५ मतको झिनो अन्तरले पोखरेल प्रतिनिधिसभा सदस्यमा निर्वाचित भएका हुन् ।
पोखरेल नेपाल प्रहरीको आईजीपी नियुक्तिको प्रतिस्पर्धामा पहिलो वरियतामा रहँदा पनि सरकारले उनलाई आईजीपी नबनाएपछि उनी चर्चामा आएका थिए । त्यसपछि उनले राजनीतिमा प्रवेश गर्दै राष्ट्रिय स्वतन्त्र पार्टीबाट प्रतिनिधिसभा निर्वाचनमा प्रतिस्पर्धा गरेका थिए ।
