काठमाडौं । काभ्रेको दक्षिणी क्षेत्र बेथानचोक गाउँपालिका–३ बोल्देमा रहेको गोरखनाथ सामुदायिक वनमा गएरातिदेखि डढेलो लागेको छ ।
वनमा राति ११ बजेदेखि लागेको डढेलो नियन्त्रणका लागि आज बिहानैदेखि प्रहरी, स्थानीय जनप्रनितिनिधि, वन उपभोक्ता समितिका पदाधिकारी तथा स्थानीयवासीले प्रयास गरिरहेका छन् ।
आगलागी भएको स्थान मानव बस्तीबाट टाढा रहेकाले हाललाई मानव बस्तीमा जोखिम भने देखिएको छैन ।
वनमा २– ३ किलोमिटर डढेलो फैलिएको छ । त्यहाँको विस्तृत विवरण आउन बाँकी छ ।
यसअघि गएको माघमा यही क्षेत्रको महाभारत पर्वतशृङ्खलाअन्तर्गत खानीखोला गाउँपालिका–१ मा रहेको थामलेखडाँडाको महाभारत जङ्गलमा लागेको डढेलो चार दिनपछि हेलिकप्टरमार्फत पानी हालेर निभाइएको थियो ।
