काठमाडौं । होली खेल्ने क्रममा छुरा प्रहारबाट युवकको हत्या भएपछि उनका आफन्त र स्थानीयले सडकमा शव राखेर प्रदर्शन गरेका छन् ।
शनिबार साँझ ५ बजेतिर होली खेल्ने क्रममा विवाद हुँदा २१ वर्षीय धर्मेन्द्र महतोले १८ वर्षीय आशु यादवमाथि छुरा प्रहार गरेका थिए ।
छाती, ढाड र पेटमा छुरा प्रहारबाट गम्भीर घाइते आशुको उपचारको क्रममा प्रादेशिक अस्पताल जनकपुरमा शनिबार साँझ करिब ६ बजे मृत्यु भएको थियो । प्रहरीले तत्कालै छुरासहित धर्मेन्द्रलाई पक्राउ गरेको थियो ।
आशुको शव आज प्रादेशिक अस्पतालमा पोस्टमार्टम भएको छ । पोस्टमार्टमपछि शव बुझेर लगेका आफन्तसहित स्थानीयले दोषीलाई कारबाहीको माग गर्दै प्रदर्शनमा उत्रिएको प्रहरीले जनाएको छ ।
शव राखेर उनका आफन्त र स्थानीयले प्रदर्शन गर्दै जनकपुर–जलेश्वर सडकखण्ड अवरुद्ध गरेका छन् ।
