काठमाडौं । शिल्यान्यास गरेको पाँच वर्ष बितिसक्दा पनि दार्चुलाका तीन वटा अस्पताल भवनको काम ठप्पप्रायः भएको छ । २०७७ सालको मङ्सिर १५ गते सरकारले दार्चुलाका विभिन्न सात वटा ठाउँमा आधारभूत स्वास्थ्य अस्पताल निर्माणको शिल्यान्यास गरेको थियो ।
अस्पताल भवन निर्माण नहुँदा, लेकम, दुहुँ र अपि हिमाल गाविसका बासिन्दा बिरामी हुँदा छिमेकी पालिकाका अस्पताल, जिल्ला अस्पताल, भारतीय अस्पताल तथा धनगढी र काठमाण्डाैसम्म पुग्नुपर्ने बाध्यता छ । अस्पताल भवन समयमै निर्माण नहुँदा साधारण सेवाको लागि बाहिर जानुपर्ने बाध्यता रहेको लेकमका स्थानीय ललितसिंह खत्री बताउँछन् ।
लेकम गाउँपालिकामा आर्थिक वर्ष २०७७/७८ मा जगदम्बायमुना जेभीले ठेक्का पाएको १० शैय्या अस्पताल अस्पताल भवन निर्माण भर्खर शुरु भएको छ । सात करोड रुपैयाँ लागतमा ठेक्का सम्झौता भएको अस्पताल निर्माणको लागि दुई पटक म्याद थप गरेपछि निर्माण अघि बढेको लेकम गाउँपालिका लेखा अधिकृत विष्टले बताए ।
दुहुँ गाउँपालिकामा पनि १० शैय्या अस्पताल निर्माण गर्न मायमुना, कौशिल जगदम्बा जेभीले आठ करोड २९ लाख रुपैयाँ लागतमा ठेक्का सम्झौता गरेको थियो । यसैगरी व्यास गाउँपालिकामा २४ करोड ७६ लाख ८५ हजार रुपैयाँको लागतमा १५ शय्याको अस्पताल निर्माण शुरु भएको थियो । अपि हिमाल गाउँपालिकामा निर्माण भइरहेको १० शैय्या अस्पताल निर्माणको काम भने अन्तिम चरणमा पुगेको छ ।
