झापा । झापामा चितुवाको आक्रमणबाट एक सशस्त्र प्रहरीसहित चारजना घाइते भएका छन् । जिल्लाको बुद्धशान्ति गाउँपालिका–४, टिमाइमा आइतबार चितुवाको आक्रमणबाट चारजना घाइते भएका हुन् ।
स्थानीय कमल खड्काको मकैबारीमा घाइते अवस्थामा फेला परेको चितुवालाई प्रहरी, वन कर्मचारी र स्थानीयले नियन्त्रणमा लिन खोज्दा स्थानीयवासी र प्रहरीलाई आक्रमण गरेको थियो ।
प्रहरीका अनुसार, घाइते हुनेमा सशस्त्र प्रहरी सुरक्षा बेस टिमाइका सहायक प्रहरी नायब निरीक्षक केदार श्रेष्ठ, बुद्धशान्ति–६ का ५० वर्षीय कृष्ण गजमेर, मेचीनगर नगरपालिका –१० का २६ वर्षीय विशाल कार्की र बद्धशान्ति–६ का ५४ वर्षीय दुर्गाबहादुर कटुवाल रहेका छन् ।
चारै जना घाइतेको बुद्धशान्तिस्थित भागिरथा न्यौपाने अस्पतालमा उपचार भइरहेको छ । आक्रमण पछि स्थानीयवासीको कुटपिटबाट चितुवाको मृत्यु भएको बताइएको छ ।
