काठमाडौं । जिम्बाब्वे समूह विजेता बन्दै टी–२० विश्वकपको सुपर आठमा प्रवेश गरेको छ ।समूह चरणको अन्तिम खेलमा आयोजक श्रीलंकालाई ६ विकेटले हराउँदै जिम्बाब्वे समूह बीको विजेता बनेको हो ।
यो समुहबाट श्रीलंका र जिम्बाव्वे यसअघिनै सुपर आठमा प्रवेश गरेका थिए । यस समूहबाट अष्ट्रेलिया, आयरल्यान्ड र ओमान बाहिरिए ।
१७८ रनको लक्ष्य जिम्बाब्वेले १९.३ ओभरमा ४ विकेट गुमाएर भेट्टायो । उसका लागि ब्रियन बेनेटले ६३ रन बनाए । कप्तान सिकन्दर रजाले ४५, तादिवान्से मारुमनीले ३४, रायन बुर्लले २३ रन बनाए ।
श्रीलंकाका दुशन हेमन्थले दुई तथा दुनिथ वेल्लालागे र दासुन शनाकाले समान एक विकेट लिए । त्यसअघि आर प्रेमादासा मैदानमा टस जितेर ब्याटिङ थालेको श्रीलंकाले २० ओभरमा ७ विकेटको क्षतिमा १७८ रन जोडेको थियो ।
श्रीलंकाका लागिपाथुम निसान्काले सर्वाधिक ६२ रनको योगदान दिए । यस्तै, पवन रत्नायकेले ४४, कुसल परेराले २२, दुनिथ वेल्लालागेले १५ तथा कुसल मेन्डिसले १४ रन जोडे ।
बलिङतर्फ जिम्बाब्वेका ब्लेसिङ मुजारबानी, ब्राड इभान्स र ग्रिमी क्रिमरले समान दुई तथा रायल बुर्लले एक विकेट लिए ।
