काठमाडौं । सुदूरपश्चिम रोयल्सले नेपाल प्रिमियर लिग (एनपीएल)मा विराटनगर किङ्सअगाडि १४८ रनको लक्ष्य राखेको छ । निर्धारित २० ओभर खेलेपछि सुदूरपश्चिमले ६ विकेटको क्षतिमा १४७ रन बनायो ।
टिमका तर्फबाट आरिफ शेखले ३२ बलमा सर्वाधिक ४५ रन जोडे भने इशान पाण्डेले ३५ बलमा ३८ रन योगदान दिए । दुवैले तेस्रो विकेटका लागि ७२ रनको महत्वपूर्ण साझेदारी गरे ।
ओपनर जोश ब्राउनले २५ बलमा २४ रन, कप्तान दीपेन्द्र सिंह ऐरीले ११ बलमा १९ रन तथा विनोद भण्डारीले १३ बलमा १५ रन बनाउँदै टोलीको स्कोर उकासे ।
विराटनगरका लागि कप्तान सन्दीप लामिछाने उत्कृष्ट बलिङ गर्दै ४ ओभरमा २० रन खर्चेर ३ विकेट लिए । प्रतिश जिसीले मात्र एक ओभरमा ४ रन दिएर २ विकेट हात पारे भने बसिर अहमदले पनि १ विकेट लिन सफल भए ।
