काठमाडौं । इन्डियन प्रिमियर लिग (आईपीएल) क्रिकेटमा सनराइजर्स हैदराबाद लखनाऊ सुपर जाइन्टसँग घरेलु मैदानमा पराजित भएको छ । उप्पलस्थित राजीव गान्धी अन्तर्राष्ट्रिय रङ्गशालामा बिहीबार राति भएको खेलमा हैदराबाद लखनऊसँग पाँच विकेटले पराजित भएको हो ।
हैदराबादले दिएको १९१ रनको विशाल लक्ष्य लखनऊले पाँच विकेट गुमाएर २३ बल बाँकी छँदै १९३ रन बनाएर पूरा गर्यो ।
लखनऊको जितमा दुई खेलाडीले अर्धशतक बनाए । निकोलस पुरनले ७० तथा मिचेल मार्शले ५२ रन जोडे ।
शार्दुल ठाकुरले अविजित २२ र डेभिड वार्नरले १३ रन बनाएपछि लखनऊले लक्ष्य भेट्टायो । यस्तै कप्तान ऋषब पन्तले १५ रनको योगदान दिए ।
हैदराबादका लागि प्याट कमिन्सले सर्वाधिक दुई विकेट लिए ।
यसअघि टस हारेर पहिले ब्याटिङ गरेको हैदराबादले निर्धारित २० ओभरमा नौ विकेट गुमाएर १९० रन बनाएको थियो । उसका लागि ट्राभिस हेडले सर्वाधिक ४७ रन बनाए ।
लखनऊका शार्दुल ठाकुरले सर्वाधिक चार विकेट लिए । उनी खेलका उत्कृष्ट खेलाडी घोषित भए ।
यस जितसँगै लखनाऊ अङ्क तालिकाको दोस्रो स्थानमा उक्लिएको छ । हैदराबाद छैटौं स्थानमा छ ।
