भक्तपुर । लामो समयदेखि स्वास्थ्य बीमाको रकम भुक्तानी नपाउँदा भक्तपुरस्थित नेपाल कोरिया नगरपालिका अस्पताल सञ्चालनमा समस्या परेको छ । जेठयता बिमाको रकम नआउँदा बिरामीको लागि खरिद गर्नुपर्ने औषधी खरिददेखि चिकित्सक नर्सको तलवभत्ता दिन समस्या भएको हो ।
अस्पतालका मेडिकल सुपरिटेण्डेन्ट डा.डि.के.रोसनका अनुसार, नेपाल कोरिया नगरपालिका अस्पतालको करिव २१ करोड ५७ लाख रुपैया भुक्तानी आउँन बाँकी रहेको छ । दैनिक नौ सयको हाराहारीलाई सेवा दिदै आएको अस्पतालमा यतिका समयसम्म बिमाको रकम नआउँदा अस्पतालका सेवा प्रभावित हुने अवस्थामा पुगेको मेडिकल सुपरिटेण्डेन्ट डा.रोसनले बताए ।
डा.रोसनका अनुसार, दशैअघि पैसा नआए कर्मचारीलाई तलव र दशैभत्ता दिन नसक्ने अवस्था आएको छ । अस्पतालले स्वास्थ्य बीमा गरेका बिरामीको स्वास्थ्य परीक्षणका अलवा औषधी समेत निःशुल्क उपलव्ध गराउँदै आएको छ ।
लामो समयसम्म स्वास्थ्य बीमाको रकम भुक्तानी नपाँउदा औषधि तथा उपकरण खरिदमा समेत समस्या भएको डा. रोसनले बताए । रकम भुक्तानीका लागि पटक पटक पत्राचार गर्दा समेत रकम पाउँन नसकेको अस्पतालले जनाएको छ ।
