सिरहा । सिरहाको लहान नगरपालिका—२४ का किसान रतन साहले विभिन्न रङ्ग र फरक स्वादका काउली फलाएका छन् । उनले गुलाबी र पहेँलो रङ्गका आकर्षक काउली उत्पादन गरेका हुन् । साहले रंगीन काउली फलाएपछि हेर्न आउनेको घुइँचो नै लाग्न थालेको छ ।
सात वर्षअघि वैदेशिक रोजगारीमा हुँदा इन्टरनेटमा यस्तो काउली देखेको साहले स्वदेश फर्किएपछि भारतबाट काउलीको बीउ झिकाएको बताए । परीक्षणका लागि पाँच धुर जग्गामा लगाएको काउलीले राम्रो उत्पादन दिएको र बजारसमेत राम्रो पाएको साह बताउँछन् । आगामी दिनमा पाँच कट्ठामा सो खेती विस्तार गर्ने सोचमा रहेको साहले बताए ।
उनको बारीमा अहिले एक किलोसम्मको काउली फलेको छ । फरक रङ्ग र स्वाद भएकाले बजारमा पु¥याउनसाथ बिक्री हुने गरेको साह बताउँछन् । यो जातको काउलीको बीउको मूल्य अन्य जातको भन्दा करिब पाँच गुणा बढी पर्ने साहको भनाई छ । साहले सोमबार मात्र १६ किलो काउली प्रतिकिलो दुई सय
रुपैयाका दरले बिक्री गरेको बताए ।
