रौतहट । रौतहटको सदरमुकाम गौरमा लगाइएको कर्फ्यु हटेको छ । नागरिक समाजको अगुवाइमा गौर–६ सबगढामा शान्ति सद्भाव र्याली निकालिएसँगै जिल्ला प्रशासन कार्यालयले कर्फ्यु हटाएको हो ।
कर्फ्यु हटेलगत्तै गौरको जनजीवन समान्य बन्न थालेको छ । बिहेको बाजालाई लिएर भएको झडपले उग्र रूप लिएपछि प्रशासनले शनिबारदेखि गौरमा कर्फ्यु आदेश जारी गरेको थियो । झडपको सुरुवात भएको क्षेत्रमा सद्भाव र्याली निकालेसँगै सोमबार बिहानदेखि कर्फ्यु हटाइएको प्रमुख जिल्ला अधिकारी दिनेशसागर भुसालले जानकारी दिए ।
नागरिक समाजका अगुवासहित राजनीतिक दलका प्रतिनिधि, स्थानीय तथा प्रशासनसहितको र्याली निकालिएको प्रजिअ भुसालले जानकारी दिए । बिहेमा चर्को साउन्डमा बाजा बजाएको निहुँमा शुक्रबार दुई समुदायबीचको विवाद चर्किएपछि स्थितिलाई नियन्त्रणमा लिन कर्फ्यु जारी गरिएको थियो ।
दुवै पक्षबीच आइतबार जिल्ला प्रशासन कार्यालयमा सद्भाव कायम राख्ने सहमति भएपछि र्याली निकालिएको हो ।
