काठमाडौं । बुधबार नेप्से परिसूचक घटेको छ । सोमबार र मंगलबार क्रमशः १२७.३२ अंक र ६.९४ अंकले बढेर २८३०.२० विन्दुमा पुगेको नेप्से आज ९०.७३ अंकले घटेर २७३९.४६ विन्दुमा पुगेको हो ।
बुधबार कारोबारमा आएका २४५ कम्पनीमध्ये ३१ वटाको शेयरमूल्य बढेको छ । २१३ कम्पनीको शेयरमूल्य घटेको छ भने एक कम्पनी स्थिर रहेका छन् । बजारमा रहेका १३ उपसमूहमध्ये सबै उपसमूहको सूचक घटेका छन् ।
आज कारोबारमा आएका ४ कम्पनीको शेयरमूल्यमा सकारात्मक सर्किट लागेको छ । यसरी सर्किट लाग्नेमा एक्सेल डेभलपमेन्ट बैंक, विन नेपाल लघुवित्त, सामुदायिक लघुवित्त र समाज लघुवित्त रहेका छन् ।
आज २ करोड ६५ लाख कित्ता शेयर १२ अर्ब ९२ करोड बराबर रुपैयाँमा कारोबार भएको छ । आज सबैभन्दा धेरै कारोबार नेपाल फाइनान्सको भएको छ ।
