भक्तपुर । भौगोलिक रूपमा भक्तपुरकै सबैभन्दा ठूलो वडा मानिने चाँगुनारायण नगरपालिका–५ ले सीमित स्रोत–साधनका बाबजुद स्वास्थ्य, शिक्षा, खानेपानी, सडक तथा दिगो पूर्वाधार विकासमा उल्लेखनीय प्रगति हासिल गरेको दाबी गरेको छ । बुधबार सम्पन्न सार्वजनिक सुनुवाइ कार्यक्रममा वडाध्यक्ष जयन्द्र खड्का खुलेर प्रस्तुत भएका थिए ।
राष्ट्रिय सञ्चार केन्द्रको आयोजनामा छालिङस्थित वडा कार्यालयमा सम्पन्न सार्वजनिक सुनुवाइ तथा प्रगति समीक्षा कार्यक्रममा वडाले पछिल्ला वर्षहरूमा जनजीवनसँग प्रत्यक्ष जोडिएका क्षेत्रमा उल्लेखनीय काम भएको जानकारी गराएको हो ।
कार्यक्रममा नगर गौरव आयोजनाअन्तर्गत ‘फास्ट ट्र्याक’ सडक निर्माण, ग्रामीण क्षेत्रका सडक फराकिलो बनाउने योजना, विपद् जोखिम न्यूनीकरण, पर्यटन प्रवद्र्धन तथा कृषिको आधुनिकीकरणका कार्यक्रमलाई प्राथमिकताका साथ अघि बढाइएको उल्लेख गरिएको थियो ।
वडाध्यक्ष जयन्द्र खड्काले साँघुरा गोरेटो बाटालाई स्तरोन्नति गर्दै सडक विस्तार, सार्वजनिक यातायातको पहुँच वृद्धि तथा सर्वसुलभ सेवा प्रवाहमार्फत वडावासीले प्रत्यक्ष अनुभूति गर्ने गरी विकास अघि बढाइएको बताए ।
उनका अनुसार चालु आर्थिक वर्षमा स्वच्छ खानेपानीको पहुँच विस्तार गर्न रु एक करोड २४ लाख लागतमा छालिङ बृहत् खानेपानी आयोजनाको ठेक्का प्रक्रिया अघि बढाइएको छ । नगरोन्मुख क्षेत्रमा ११ वटा डिप बोरिङ सम्पन्न गरी घरघरमा पिउने पानी पु¥याउने कार्यसमेत गरिएको जानकारी दिइयो ।
त्यसैगरी कमलविनायक–नगरकोट, तेलकोट–गोरखनाथ, खरिपाटी–मनकामना तथा सैनिक शिक्षालय हुँदै वडा कार्यालय र मच्छेनारायण जोड्ने सडकलाई १२ मिटर फराकिलो बनाइ कालोपत्र गर्ने तयारी भइरहेको जनाइएको छ ।
दुई कार्यकालदेखि वडा नेतृत्व सम्हाल्दै आएका वडाध्यक्ष खड्काले जनताको विश्वास कायम राख्दै स्थानीयको सुझाव र आवश्यकताका आधारमा विकास र सुशासनको अभियान अघि बढाइएको दाबी गरे ।
वडा कार्यालयले महिला उद्यमशीलता कार्यक्रममार्फत एकल महिला तथा अन्य महिलालाई आर्थिक आत्मनिर्भर बनाउने उद्देश्यले विभिन्न सीपमूलक तालिम सञ्चालन गरेको जनाएको छ । ज्येष्ठ नागरिकका लागि मनोसामाजिक परामर्श, बालमैत्री कार्यक्रमअन्तर्गत चित्रकला र खेलकुद तथा युवालक्षित परियोजनासमेत सञ्चालनमा रहेका छन् ।
कृषि, पर्यटन र पूर्वाधारमा स्थानीयको जोड
सार्वजनिक सुनुवाइमा सहभागी स्थानीयवासीले कृषि, पर्यटन र पूर्वाधार विकासलाई प्राथमिकतामा राख्न सुझाव दिएका थिए । सहरीकरणको प्रभाव तुलनात्मक रूपमा कम रहेको छालिङ क्षेत्रको अधिकांश भूभाग अझै कृषियोग्य रहेकाले कृषिमा विशेष योजना ल्याउनुपर्ने माग गरिएको थियो ।
कार्यक्रममा स्थानीयले रासायनिक मलको अभाव, विपद् व्यवस्थापनको पूर्वतयारी, सडक स्तरोन्नति, पिउने पानी, अपाङ्गमैत्री पूर्वाधार, रोजगारी सिर्जना तथा सीपयुक्त तालिमको व्यवस्था गर्न माग राखेका थिए ।
सीमित बजेट, बढ्दो जनअपेक्षा
राष्ट्रिय जनगणना २०७८ अनुसार वडा नं. ५ मा नौ हजार २५४ जनसंख्या रहेको छ । चार हजार ५५९ पुरुष र चार हजार ६९५ महिला बसोबास गर्ने उक्त वडामा दुई हजार ९९७ घरधुरी रहेका छन् । साविक छालिङ गाविसको क्षेत्र समेटिएको वडा ९ दशमलव ६१ वर्गकिलोमिटर क्षेत्रमा फैलिएको छ ।
भौगोलिक रूपमा जिल्लाकै ठूलो वडा भए पनि जम्मा रु दुई करोड बजेटमा ७२ किलोमिटर सडक सञ्जालसहितका विकास आवश्यकता पूरा गर्न चुनौतीपूर्ण रहेको जनप्रतिनिधिहरूले बताएका छन् । सीमित स्रोत र बढ्दो जनअपेक्षाबीच काम गर्नुपर्दा धेरै योजना चाहेर पनि तत्काल कार्यान्वयन गर्न नसकिएको गुनासो उनीहरूको थियो ।
सार्वजनिक सुनुवाई तथा प्रगति समीक्षा कार्यक्रममा सबैजसो ठूला दलका वडा नेतृत्वले प्रतिनिधित्व गरेका थिए । कार्यक्रममा वडा अध्यक्ष जयन्द्र खड्काले वडावासीलाई भगवानको संज्ञा दिँदै आफू पुजारी मात्रै भएको भनाई राखेका थिए । दुई कार्यकाल वडाको नेतृत्व गरेका उनले सधैं जनताको विचमा बसिरहने घोषणा पनि कार्यक्रममा गरेका थिए ।
