कञ्चनपुर। धान बिक्री गर्न आउने किसानलाई खाद्य व्यवस्था तथा व्यापार कम्पनी लिमिटेड शाखा कार्यालय महेन्द्रनगरले चेकमार्फत भुक्तानी गर्न थालेको छ। किसानको सहजताका लागि धान खरिद गरेसँगै भुक्तानीको व्यवस्था मिलाइएको कार्यालयका प्रमुख सुदर्शन थापाले बताए।
भीमदत्त नगरपालिकाको महेन्द्रनगर र शुक्लाफाँटा नगरपालिकाको झलारीमा खाद्यले धान खरिद केन्द्र संचालनमा ल्याएको छ। जनशक्ति अभावमा बेदकोट नगरपालिकामा स्थापन गर्ने भनिएको खरिद केन्द्र संचालनमा ल्याउन नसकिएको उनले उल्लेख गरे।
‘प्रदेश कार्यालयलाई यथाशीघ्र जनशक्ति उपलब्ध गराउन सरोकार भएका निकायसँग आग्रह गरेका छौँ,’ प्रमुख थापाले भने, ‘जनशक्ति व्यवस्थापन भएसँगै एक-दुई दिनमा धान खरिद केन्द्र संचालनमा ल्याउछौँ।’ उनका अनुसार संचालनमा रहेका दुई वटै केन्द्रबाट हालसम्म ८ सय १२ क्विन्टल धान खरिद गरिएको छ।
प्रचारप्रसारको कमीले थोरै किसान मात्र धान बिक्रीका लागि केन्द्रमा पुगेकाले अहिले गाउँ-गाउँमा जानकारीसहित किसानलाई आवश्यकता अनुसार धान बिक्री गर्न अनुरोध गरिएको प्रमुख थापाले बताए। कम्पनीले प्रति क्विन्टल ३ हजार ४ सय १० रुपैयाँ ५१ पैसामा धान खरिद गरिरहेको छ।
कम्पनीको १५ हजार क्विन्टल धान खरिद गर्ने लक्ष्य रहेको छ। गत वर्ष सोही लक्ष्य अनुसार २ हजार ९ सय क्विन्टल धान खरिद गरिएको कम्पनीले जनाएको छ।
धेरै वर्षपछि कम्पनीले शाखा कार्यालय बाहिर खरिद केन्द्र संचालन गरी किसानलाई सहजीकरण गरेको हो। किसानबाट माटो नभएको, भुस, पराल नभएको, नभिजेको गुणस्तरीय धान कम्पनीले खरिद गरिरहेको छ।
कम्पनीको शाखा कार्यालयले खरिद गरेको धान कुटानी गरी माग भएका क्षेत्रमा आपूर्ति गर्दै आएको छ। शाखा कार्यालयमा कार्यलय प्रमुख, सहयोगीसहित ३ जना कर्मचारी कार्यरत छन्।
